كيكة بالكريم باتسيير روعة

كيكة بالكريم باتسيير روعة

هده تجربتي لكيكة بلاكريم باتسيير
نبداو بسم الله
درت 2 كيسان عنبة حليب مع 2 معالق كبار سنيدة ومعلقة كبيرة ونصف كريم باتسيير وعملت الكل فوق النار وبقيت نحرك على نار مهيلة حتى تقال خليتو على جنب ودرت فيه شوية ديال الزبيب
 ودابا ندوزوا لتحضير الكيك
في مولينكس درت 2 بيضات و6معالق كبار سنيدة و6معالق كبار حليب و معلقة صغيرة خل 1 ساشي فاني
نضرب الكل
 
تم نفرغه في طاوة
 
 ونضيف له 6 معالق كبار فورص وخمارة ونخلط الكل بالمعلقة
 
تم نفرغه في مول مدهون ومرشوش بالطحين تم نفرغ فوقها كريم باتسيير  
 
تم رتبت على وجه الكيك التفاح ورشيت من فوق بشوية سنيدة ودخلتها للفرن
 
 هاهي منين طابت 
 
 وفي الاخير هاهو الكوتي خفيف ظريف

اللهم ادمها علينا نعمة واحفظها من الزوال يارب
لا تنسوني من دعواتكم لي ولاولادي عن ظهر الغيب فدعوة الغريب مستجابة
 وهادا طريف لاول وحدة تشجعني بالصحة والراحة
 

2 كيكات اقتصاديين وساهلين وروعة في المداق والمنظر

اولا المقادير ديال الكيكة الاولى كالاتي
2 بيضات خمارة حمراء كاس سنيدة نصف كاس زيت قشور برتقالة كاس طحين عامر مزيان والى حبيتو ضيفو كاس دانون فاني لكن انا معملتوش حيت تقيدت بالمقادير لي عندي في الدار
الطريقة نضرب كل المقادير في مولنكس من بعد نفرغ الخليط في طاوة ونضيف الخميرة والطحين ونخلط الخليط بمعلقة ونفرغه في مول مدهون بالزبدة ومرشوش بالطحين والى الفرن منين نخرجوها من الفرن وتبرد نضعها في طبق التقديم ونعمل لها الاطار ديال الحديد داك لي كيتزاد ويتنقص
كنسقيوها ب3ارباع كاس ديال الحليب



‎
 المهم ندوزو دابا نوجدو الكريم باتسيير كالاتي 
نصف ليتر حليب مع 4 معالق كبار سنيدة و2 معالق كبار عامرين بودرة الباتسيير ونعمل الكل على النار حتى يعقد ونحيدوه ونفرغه على الكيكة ونستفوا فوق منو اي فاكهة بغيتي انا عملت البنان وندخلها للتلاجة ماشي المجمد باش الكريم باتسيير يشد راس
وندوزوا نوجدو الطبقة الاخيرة وهي مكونة من
2 كيسان عصير البرتقال و2 معالق كبار سنيدة و3 فلان فاني ونعمل الكل على النار حتى يغلى بحال منين كنعملو الفلان مع الحليب ومنين يبرد شوية نسكبه فوق البنان على الكيكة كاملة ونرجعها للتلاجة وهاهي واجدة بالصحة والراحة
وهاهي واجدة الى بغيتو تزيدو تزينوها بالشكلاط او كريم شانتيي او لي بغيتو لكم الاختيار وشكر 


الان المقادير ديال كيكة التانية
2 بيضات نصف كاس زيت 2 معالق كبار كاوبيل كاس سنيدة خمارة حمراء وربع كاس ديال الحليب و2 كيسان طحين
كيف العادة نخلط الكل في مولينكس من بعد نفرغ الخليط في اناء ونضيف الخمارة والطحين والكاوبيل مغربلين ونفرغ الخليط في مول مدهون بالزبدة ومرشوش بالطحين والى الفرن
منين نخرجوها نخليوها تبرد شي 5 دقايق ونحيدوها من المول ونضعها في طبق التقديم نسقيها بكاس ونصف ديال القهوة كحلة ولي بغيتو سواء نسكافي مع الماء او القهوة المعصرة انا كنعمل القهوة لي كنوجدها في الدار بالعصارة
من بعد نتركها تتشرب ديك القهوة 


في هاد الاتناء نوجد لاكريم باش ندهنوها
ناخدو 2 دانون ديال الشكلاط ديال جودة و10 ديال مربعات ديال الشكلاط العادي ديال 5 دريال للمربع وندوبهم على نار مهيلة على الاخر تم نطلي بيه الكيكة كلها ونخليوه يهبط على جوانب الكيكة كنوع من الديكور ومن الفوق زوقتها بالكوك وانتم لكم الاختيار زوقوها بلي بغيتو وانتم افضل مني في الديكور اخواتي اللهم ادمها علينا نعمة واحفظها من الزوال يارب
وهاهي واجدة 


دعواتكم لي ولاولادي وزوجي بالستر والرضا اللهم استرنا فوق الارض وتحت الارض ويوم العرض
اللهم ادخل والدي الجنة بغير حساب ولا سابق عداب

حرشات بالزيب ياسلام روعة في المداق

مساء الخير
المقادير
نصف كيلو سميدة رقيقة
2 كيسان حليب عادي
2خمارة حمرين
كاس سنيدة
كاس زيت
شوية زبيب
شوية ملح
الكاس لي عبرت بيه ديال العنبة
نخلط السميدة وسنيدة والملح والخمارات من بعد نضيف الزيت نخلط مزيان تم نضيف الزبيب ونخلط واخيرا نضيف الحليب ونخلط كلشي نتركها شي شوية تشرب جهد 2 الى 4 دقائق 


نرشو الاطا مزيان بالسميدة

ناخدو زليفة صغيرة ندهنوها بالزيت 

ونرشوها بشوية سميدة

تم نضع فيها شوية من الخليط نملس عليه بايدينا باش نقادو الوجه ديالها تم نرشه بالسميدة

ونقلبها في الاطا


من بعد نبقاو غير نرشو الزليفة بالسميدة بلا دهين ونضع الخليط ونقلب في الاطا نفس الطريقة ديال الحريشات سبقت قدمتهم لكن هادو فيهم الزبيب ومافيهمش الزبدة
منين تكملو رشو عليهم السميدة من فوق
هادوك الساشي ديال لفاني مكنديرهمش في الحريشات حيت غتقولو ليا نسيتهم هادوك درت بيهم العصير حيت الحرشة فيها الزبيب لا داعي للفاني
ودخلوهم للفرن هاهم الحريشات طابو

وبالصحة والراحة قدموهم مع كويس اتاي مشحر وشوية زيت العود والزبدة والعسل 
 الحريشات درتهم نهار الجمعة للمعلمات في الروض لي فيه بنتي مع قارورة العصير وشوية ديال الفاكية والباقي كلاه زوجي وولدي

القاكم على خير لا تنسوني من دعواتكم عن ظهر الغيب جزاكم الله خيرا 

فلان كراميل صنع بيتي

السلام عليكم حبيباتي واخواتي في الله
اليوم جبلت ليكم كريم كراميل دقتوا عند صديقة عزيزة عليا وبحال بنتي لانها فعلا كيف بنتي وعجبني وسولتها على المقادير وجيت لداري مكدبت خبر جربتوا على الفور
المقادير مصورتهمش ولكن ساهلين
اولا ناخدو كاس عنبة سنيدة نعملوه على النار حتى يدوب ويصبح كراميل تبارك الله الحادكات ديالنا كتعرفوا هاد المرحلة منين تدوب نخويوها في المول
تانيا مقادير الفلان
نصف لتر حليب عادي
2 ساشي فاني
كاس عنبة من بودرة حليب نيدو
نصف كاس عنبة سنيدة
4 بيضات
نخلط المقادير كلها ونفرغها في المول فوق سنيدة لي حضرناها من قبل
تم نضع المول في مول اخر فيه الماء اي حمام مرية وندخل الكل للفرن مدة 40 دقيقة
تم نخل السكين الى خرج ناشف راه طاب نتركه حتى يبرد على برا عاد ندخله للتلاجة وعند التقديم نقلبوه في اناء التقديم ونحطوه فوق المائدة ديالنا كديسير مع طبيسلات صغار باش كل واحد نعطيوه حقوا في طبيسيل صغير وبالصحة والراحة
وهاهما التصاور لي صورت







اللهم ادمها علينا نعة واحفظها من الزوال
اللهم استرني فوق الارض وتحت الارض ويوم العرض

قصرية ديال كسكس بالبلبولة

كيفكم حبيباتي  نتمنى الكل بالف الف خير
نبداو بسم الله
هادي البلبولة ديال البكية



هنايا دهنتها بالزيت حركتها في البانيو مزيان



عاد رشيتها بكاس ديال العنبة ديال الماء خليتها تتشرب شوية


في هاد الاتناء مشيت
درت اللحم في الكوكوت مع البصلة والعطرية ملح بزار سكنجبير خرقوم الزيت وخليت الكل يتقلى مزيان


من بعد ضفت معلقة صغيرة سمن ومطيشة محكوكة وشوية ديال الماء وخليتو يزيد يتقلى


من بعد رويت الماء وغلقت الكوكوت باش يطيب اللحم سديت الكوكوت على اللحم من بعد شديت الكسكاس ديال الكوكوت درت فيه ديك الصفاية


لكتكون عندنا في الطحانة اليدوية ديال مطيشة والسبب باش يخرج البخار من دوك العيون عوض عوينة وحدة لي كتكون في الكسكاس الخاص بالكوكوت  هاد الفكرة قالتها ليا صديقة معايا في العمل جزاها الله خيرا نتمنى نكون وصلت ليكم الشرح مزيان
المهم هاهي البلبولة شربات الماء


نديروها في الكسكاس ونعملوه فوق الكوكوت بعد 20 دقيقة على طياب اللحم


ونخلي البلبولة تفور لمدة 15 دقيقة ادن غيكون اللحم خدا 35 دقيقة في الطياب
من بعد نخويو البلبولة في البانيو


ونرشها بالماء


ونفكوها بايدينا بحال هاكدا



ونمشي ندير اللفت وخيزو في الكوكوت


والى عندكم خضرة اخرى بغيتو تزيدوها نتوما ودوقكم انا حيت هادشي لي موجود عندي من بعد رويت وغلقت الكوكوت ورديت البلبولة تفور الفورة 2 لمدة 15 دقيقة


دابا خويتها في البانيو عوتاني


ودرت ليها الملح


ورشيتها بالماء وفكيتها


ودهنتها بزيت العود

ومشيت ندير في الكوكوت الكرمب والكرعة الحمراء والخضراء وربطة ديال الربيع ومطيشة محكوكة وفلفلة حارة مزاود ودقت المرق في الملح ورشيت شوية بزار من فوق ورويت الى خاص الماء


وغلقت الكوكوت على الخضرة شي 5 دقايق بعد تصفير الصفارة عاد نردوا البلبولة تفور للمرة 3 لمدة 10 دقايق ونزولوها
دابا جا وقت الغداء
نحطو البلبولة في القصرية ونديرو اللحم في الوسط والخضرة من فوق وناخدو واحد المعلقة صغيرة ديال السمن نديروها في البلول لي في الكوكوت عاد نبداو نسقيوا الكسكس ديالنا وبالصحة والراحة



صورتها في الكوينة راه غير الكرعة الحمراء دغية نقب منها ولدي مخلاوني حتى نحطها فوق الطبلة مع كويسات اللبن زربوني ههههة
اللهم ادمها علينا نعمة يارب واحفظها من الزوال 

السلام عليكم في مدونتي و مرحبا بكم في المطبخ الخاص بكم، واتمنى أن تنال إعجابكم جميع الأطباق التي أقدمها و منها حلويات و بيتزا و و كيكات و مشروبات و المزيد انشالله . في انتظار تشجيعاتكم دعواتكم عن ظهر الغيب جزاكم الله خيرا وشكرا

السلام عليكم
انتظر تشجيعاتكم ودعواتكم لي عن ظهر الغيب